نظرت لى نظرة مستحية من بين عينيها المدارية
نظرة ذبحت روحى القوية خلتها فرخة مستوية
ضحكت ضحكة هستيرية و ضربت دماغى بالروسية
لويت راسى بعنجهية وصرخت فيها صرخة مدوية
إن كنت فاكرة نفسك عفية فأنا أقوى من ميت ولية
و إن مديتى إيدك علية ضربتك بدل القلم مية
و بعد ما انفضت الخناقة دية لقيتها راجعة تبوس إيدية
معلهش يا سيد الأفندية غلطانة و حقك علية
الحق يا إخوانى كبرت فى عينية و قلتلها قومى يا هنية
ربنا بعتك لية هدية و هتبقى مراتى الحلال لية
زغردت من فرحتها الولية و رقعت بصوتها يا سعدك يا هنية
رحت واخدها فى العربية ورحت لأبوها بعد عشية
أطلب منه إيد الصبية شايل فى إيدى ليهم هدية
قابلنى أبوها و رحب بية هاتى الشربات يا أم هنية
جات أمها شايلة المهلبية تزغرد و تقول عقبالك يا سنية
سنية تبقى أخت هنية و أخت صبحى و سعد و سعدية
و لقيتهم كلهم فى اللحظة دية فوق دماغى و من حولية
نازلين بوس و أحضان فية و أنا لا حول و لا قوة لية
كعبلوا بدلتى المكوية و داسوا على جزمتى البنية
نزلت من عندهم الفجرية متبهدل من اللى جرى فية
و بعد شهرين و شوية كانت دخلتى على البُنية
و عشت معاها أيام هنية بعد شهر العسل و الطحنية
بعدها ظهرت الحقيقة مرئية عيشة نكد و خناقات يومية
و أنا اللى فاكر متجوز حورية أتاريها شيطانة بنت جنية
نغصت حياتى و قال هنية و هية داهية كبيرة متوارية
قصر الكلام يا أفندية سيبتها و عيشت فى حرية
بلا جواز بلا خيبة قوية مالها عيشة العزوبية
تاكل براحتك و بلا مسئولية و لا حدش يسألك عن ماهية
تخلص فلوسك تاكل لقمة طرية معاك فلوسك تاكل لحمة مشوية
من الآخر بقى يا صهبجية دى قصة ضرب و لا ليها دية
من الكاتب ؟ :)
ReplyDeleteالعبد الفقير لله
Deleteمحمود بهجت